Apirileko ohiko osoko bilkurak udalbatzak egiten dituen osoko bilkuretako bideo-akten sistema ezartzea onartu du. Neurri horren bidez, gardentasuna sustatu nahi da udal-ekintza eta -kudeaketan, herritarrei egiazko informazioa askatasunez jakinarazi eta jasotzeko eskubidea bermatu, eta, azken batean, udal-jardueraren eraginkortasuna eta efizientzia hobetu, Udalaren giza baliabideak eta baliabide teknologikoak ahalik eta ondoen aprobetxatuz.
Sistema berria indarrean sartzen denean, bilkura bakoitzaren akta egingo da, Korporazioko idazkariak izenpetuta, eta, funtsean, honako alderdi hauek jasoko dira: eguna, hilabetea eta urtea, hasteko eta amaitzeko ordua, bertaratutako kideak, aztertutako gaiak, hartutako erabakiak, egindako esku-hartzeen eta bozketen laburpena, halakorik dagoenean, eta bideo-aktaren URL esteka. Akta osatzeko, Osoko Bilkuraren saioetako irudiak eta audioa bideoz grabatuko dira, osorik, hasieratik amaierara. Horrela, zinegotzien esku-hartzeak oso-osorik jasoko dira bideo-euskarrian, eta bideo-aktatzat hartuko da, grabazioa zein ordu, minutu eta segundotan egin den identifikatuta.
Ondoren, grabatutako irudiak eta audioa editatu egingo dira, egindako esku-hartzeak eta hartutako erabakiak errazago ikusi edo jarraitzeko. Grabazio horien emaitzak udalaren webgunean egongo dira eskuragarri. Une horretatik aurrera, hala zinegotziek nola nahi duten herritarrek bideo aktaren eduki osoa ikusi ahal izango dute, eta Udalaren zerbitzarian artxibatuko da, Udal Idazkaritzan gordeko den segurtasun kopia batekin.
Bilkuran, halaber, Turismo, Merkataritza eta Kontsumo Sailarekin sinatutako hitzarmena aldatzeko gehigarri bat onartu zen, Next Generation funtsekin ordaindutako Jasangarritasun Turistikoko Plana gauzatzeko Udalari emandako zuzeneko dirulaguntza bideratzeko.
Mozioak
Era berean, osoko bilkuran EH Bilduk aurkeztutako mozio bat onartu zen, non Udalaren eta udalerriko kontzejuen artean lan batzorde mistoak sortzea eskatzen den, koordinazioa errazteko, herri bakoitzaren beharrak aztertzeko eta jarduera proposamenak egiteko. Mozioak adierazten duenez, “batzorde horiek azpiegiturei eta mantentze-lanei, hirigintzari eta plangintzari, landa-garapenari eta udal-zerbitzuei eragiten dieten eremuetan eratu ahal izango dira”, eta ezartzen du, osagarri gisa, Alkatetzak gutxienez sei hilean behin deituko dituela administrazio-batzarretako ordezkariak, eta, azkenik, Añanako Kuadrillari eskatzen dio bete dezala, hala badagokio, dagokion foru-arauak kontzejuekiko koordinazio-batzorde espezifikoak sortzeari dagokionez ezartzen duena.
Testu hori, EAJ-PNVk bultzatutako beste mozio baten alternatiba gisa aurkeztua, atzera bota zena, eta Udalaren eta Udalerriko Kontzejuen artean kontsultarako eta partaidetzarako organo bat sortzea planteatzen zuena, aurrera atera zen PSE-EEren eta EH Bilduren aldeko botoekin eta EAJko eta PPko zinegotzien aurkako botoarekin. Alderdi Popularrak ere atzera bota zuen euskal nazionalistek aurkeztutakoa ordezkatzeko beste mozio bat.
Azkenik, talde jeltzaleak udal frontoiko hormaren errotulazioari buruzko proposamen bat aurkeztu zuen, “Roman Gutierrez” izenarekin. Proposamena bertan behera geratu zen, soilik aldeko bost boto (EAJ-PNV eta PP) eta kontrako sei (PSE-EE eta EH Bildu) izan baitzituen. Gogoratuko denez, 2023ko azaroan osoko bilkurak erabaki zuen kirol instalazioa izendatzea, urte askoan Olentzeroren figura gorpuztu zuenaren izenarekin, eta izen hori, dagokion plakarekin, frontoiko sarrerako atean bertan agertzen da.
